Só het kiesers gestem

Die ANC se steun het op nasionale vlak sedert 2014 van 62,15% na 57,5% gedaal. Die DA het van 22,23% na 20,77% gedaal en die EFF het gegroei van 6,35% na 10,78%.

Die finale syfers is deur die Onafhanklike Verkiesingskommissie (OVK) bekend gemaak.

Altesame 26 779 025 Suid-Afrikaners was vir die verkiesing geregistreer, maar slegs 17 671 616 kruisies is by die onderskeie stempunte getrek. Volgens die OVK het slegs 65,99% van die geregistreerde kiesers hul stem uitgebring.

In Limpopo het die ANC se steun van 78,6% na 75,49% gedaal en die DA van 6,48% na 5,4% gesak. Die EFF het egter van 10,74% na 14,43% gestyg.

Die Vryheidsfront Plus (VF Plus) het opslae gemaak toe hul hul steun op nasionale vlak van 0,9% na 2,38% opgestoot het. In Limpopo het steun vir dié party van 0,69% na 1,42% gestyg.

In Die Pos se lesersgebied het 50 880 kiesers in die Modimolle/Mookgophong/Vaalwater-gebied vir die verkiesing geregistreer. In Bela-Bela het die registrasies op 30 745 kiesers gestaan.

In die Modimolle/Mookgophong/Vaalwater-gebied het daar egter slegs 33 455 op nasionale vlak gestem en 32 350 op provinsiale vlak. In Bela-Bela is 19 928 kruisies vir die nasionale stem en 18 873 kruisies vir die provinsiale stem getrek.

Die ANC het in die Modimolle/Mookgophong/Vaalwater-gebied 58,53% nasionale stemme getrek en 56,97% op provinsiale vlak.

Die DA het 17,74% (nasionaal) en 18,24% (provinsiaal) gekry en die EFF 11,04% (nasionaal) en 12,33% (provinsiaal). Die VF Plus het 9,96% (nasionaal) en 10,02% (provinsiaal) in dié gemeenskap ingepalm.

In Bela-Bela het die ANC 63,44% steun op nasionale vlak ontvang en 61,82% op provinsiale vlak.

Die DA het 15,77% (nasionaal) en 16,35% (provinsiaal) ontvang met die EFF 9,36% (nasionaal) en 11,32% (provinsiaal). Die VF Plus het 7,56% (nasionaal) en 6,71% (provinsiaal) ontvang.