![](https://images.caxton.co.za/wp-content/uploads/sites/134/2019/05/burglary.jpg)
Die polisie vermoed dat dieselfde boewe, wat iewers tussen Saterdag en Sondag (11-12 Mei) by kapt. Emsie Roux van die Bela-Bela-polisie se huis ingebreek het, reeds geruime tyd in die omgewing doenig is.
Hulle het talle waardevolle items gesteel terwyl sy nie tuis was nie.
Roux het by navraag gesê sy is Sondag ingelig dat twee verdagtes by huise naby hare probeer inbreek het, maar onsuksesvol was. Sy vermoed dat dit dieselfde verdagtes is wat haar eiendom geteiken het.
“Hulle het die diefwering by een venster oopgebuig sonder om ’n ruit te breek en het só toegang tot die huis verkry. Hulle het probeer om my wapenkluis met ’n swaar stuk staal oop te breek, maar kon dit nie regkry nie,” het sy gesê.
Hulle is onder meer weg met ’n skootrekenaar, skoene, parfuum, selfoontoestelle, klere en ’n selfoonsimkaart.
“Dit is vreemd dat hulle die kos, wintersklere, my verloofring en werkselfoon gelos het,” het sy gesê.
Sy het reeds ’n saak van inbraak en diefstal by die polisie geopen.
- Natasja Kemp van die Bospoort-buurtwag het gesê inwoners kla deesdae oor misdaad in dié buurt en talle mense het gevra om op die buurtwag se noodgroep geplaas te word. Die groep se doel is om voorvalle en verdagte aktiwiteite aan te meld.
“Mense is steeds onder die wanindruk dat hulle net hul klagtes op dié WhatsApp-groep kan plaas en dat dit deur iemand anders opgelos sal word. Intussen is hulle onwillig om aan patrollies deel te neem of by die Plaaslike-reaksiespan (die RSRT-buurtwag) in te skakel om die misdaadprobleem te help oplos,” het sy gesê.
“Ons moet almal saamstaan om ons omgewing te beveilig.”
Kemp en Roux het albei gesê misdaad in die omgewing styg sodra daar iewers in die omgewing gebou word.
’n Ander probleem is die baie leë erwe in die omgewing. “Dit gee verdagtes die geleentheid om ongesiens rond te sluip en die omgewing te bespied,” het Kemp gesê. Talle eienaars het volgens haar ook gekla dat hul heinings die afgelope tyd beskadig is.
“Statistieke wys dat die meeste inbrake in die vroeë oggendure plaasvind wanneer mense diep slaap,” het Kemp gesê.
Kemp gaan eersdaags op kraamverlof, maar is steeds beskikbaar vir mense wat verdagte aktiwiteite wil aanmeld of by die buurtwag inskakel. Inwoners kan intussen vir Janes Boshoff by tel. 072 492 7087 bel om voorvalle aan te meld.