Die Pos het by Laetitia Louw Cilliers, sekretaresse van die Suid-Afrikaanse Vroue-federasie (SAVF) in Bela-Bela, asook bestuurslid van die Warmbad-maratonklub, gaan inloer om haar liplekker resep vir slap mieliepappoffertjies af te bedel.
Sy het die resep in Huisgenoot se Wenresepte 2-boek ontdek, maar het ’n paar aanpassings aangebring. Haar huismense en gaste geniet altyd die gereg en vra gewoonlik vir meer, sê sy.
Bestanddele en voorbereiding:
- 100 ml mieliemeel
- 500 ml water
- 2,5 ml sout
Metode:
Meng die meel en die water. Bring tot kookpunt op die stoof en laat stadig prut vir so 15-20 minute in ’n pot met ’n deksel. Roer af en toe.
Laat die pap afkoel totdat dit louwarm is.
Addisionele bestanddele en voorbereiding:
- ’n Koppie koekmeel
- 2 ml mosterdsous
- 5 ml bakpoeier
- 2,5 ml sout
- 2,5 ml cajun speserye
- 2,5 ml origanum
- 100 ml gerasperde Weense worsies
- 100 ml gerasperde kaas
Metode:
- Meng al bogenoemde bestanddele en die pap met 100 ml melk tot ’n slap deegmengsel.
Verhit kookolie tot warm. - Skep teelepels van die mengsel in die olie en bak totdat die poffertjies goudbruin is.
- Skep uit en strooi met Aromat-groentesout.
- Bedien en geniet.
