Warries gaan kuier vir Koben – VIDEO
“Ons bly positief oor die pad vorentoe"
![](https://images.caxton.co.za/wp-content/uploads/sites/134/2018/06/koben-hofmeyr.jpg)
’n Afvaardiging van Hoërskool Warmbad het gister (Donderdag 7 Junie) na Pretoria gereis om hul meelewing te betoon en ondersteuning te bied aan Koben Hofmeyr (15) van Hoërskool Louis Trichardt, wat verlam is ná ’n skolerugbywedstryd tussen die o.16 A-spanne van Hoërskool Louis Trichardt en Hoërskool Warmbad.
Koben het tydens dié wedstryd op Saterdag 26 Mei ’n ernstige nekbesering opgedoen. Hy sterk tans in die hoësorgeenheid van die Groenkloof-hospitaal (voorheen Little Company of Mary) in Pretoria aan en is van die bors af ondertoe verlam, het sy pa, Trompie, aan Die Pos gesê.
Paul Liddle, skoolhoof van Hoërskool Warmbad, Johan Loubser, sporthoof by die skool, en UK-lede JD Fourie, Erika Enslin en Su-Mel Meyer het Koben in die hospitaal besoek en hom bemoedig. Jackie Huisamen, fisioterapeut van die dorp en lid van die Warries se beheerliggaam, was saam. Die Pos is ook saamgenooi.
Liddle het aan Koben gesê die Warries het reeds ’n groot bedrag geld ingesamel wat tot sy se mediese sorg sal bydra. Die skenking is moontlik gemaak deur die skool se beheerliggaam. Hulle beoog om nog fondsinsamelings vir Koben te hou.
Die groep het vir Koben gebid en hom ’n spoedige herstel toegewens. Koben het gesê hy waardeer die besoek en is dankbaar vir die gebaar.
“Ons bly positief oor die pad vorentoe, want negatiwiteit gaan niks aan die saak verander nie,” het sy pa gesê.
“Almal het op die dag van die besering gedoen wat hulle kon om hom te help. Ek is net bly dat ek my kind onder omstandighede kan inspireer, want hy het maar sy af dae.”
Die Koben Hofmeyr-fonds is sedert die voorval gestig om vir sy behandeling te betaal.
Trompie het gesê samesprekings word gevoer om te kyk of dié fonds ook aangewend kan word vir ander jong rugbyspelers in die provinsie wat ernstig beseer word.
Bekende rugbyspelers soos Victor Matfield en Jesse Kriel, asook die sanger Steve Hofmeyr, het Koben al in die hospitaal besoek en ondersteun.
Talle skole het op sosiale media en op ander maniere hul ondersteuning aan Koben getoon.
* Besoek die Koben Hofmeyr-fonds se Facebook-blad vir meer inligting.