Tienerseun (16) oorlede na fietsongeluk
Andries Botha (16) het ongeveer drie weke na sy ongeluk, sy laaste asem uitgeblaas.
![](https://images.caxton.co.za/wp-content/uploads/sites/115/2024/04/Andries-Botha-780x470-1.jpg)
Andries Botha (16), die tiener wat Vrydag, 8 Maart in ‘n fietsongeluk op die hoek van Chris Hanistraat en Walter Sisululaan in Potchefstroom was, is verlede week dood weens beserings wat hy in die ongeluk opgedoen het.
Andries is 27 Maart breindood verklaar en 29 Maart oorlede.
Volgens sy ma Carina moet ‘n nadoodse ondersoek nog gedoen word voordat begrafnisreëlings getref kan word.
![](https://images.caxton.co.za/wp-content/uploads/sites/117/2024/04/Andries-Botha-503x400.jpg)
Andries, wat tuisonderrig ontvang, was die betrokke dag in ‘n ernstige ongeluk toe ‘n verkeersmotor hom die oggend omstreeks 08:30 by die verkeerslig getref het.
Hy het veelvuldige beserings tydens die ongeluk opgedoen. Hy is op die dag van die ongeluk na die Netcare Alberton-hospitaal oorgeplaas waar hy met ‘n ventilator aan die lewe gehou is.Hy het ook ‘n globale breinberoerte op 18 Maart opgedoen. Dokters moes eers deur middel van toetse vasstel of daar nog lewe op Andries se brein was.
Noordwes polisiewoordvoerder, lt.kol. Amanda Funani het genoem dat ‘n saak van roekelose en nalatige bestuur ondersoek word.