Van die klub se vegters het op 30 Julie aan die Jock of the Bushveld kompetisie in Nelspruit deelgeneem. Vegters van Gauteng en Mpumalanga het mekaar tydens die kragmeting die stryd aangesê.
Drie vegters van Carletonville, Kenneth Golden, Emma Golden en Tyron Fernandez, het as deel van die Gauteng-span aan die byeenkoms gaan deelneem.
Emma, wat maar net 10 jaar oud is, het die dorp se naam hoog gehou toe sy drie goue medaljes in “semi light” en “kick light” gewen het. Sy is ook as die algeheel beste vegter aangewys.
Haar boetie Kenneth, het twee goue- en een silwermedalje in “semi light” en “kick light” ingepalm, terwyl Tyron ‘n silwermedalje in die volkontak-afdeling huis toe gebring het.
Volgens die vegters se afrigter, shihan Chimmy van Winkel, het die Gauteng-span die byeenkoms oorheers en met die meeste medaljes weggestap.