Die EFF het Donderdag met ‘n video op sosiale media sy dreigement herhaal om skole te sluit indien die departement van basiese onderwys dit nie doen nie. Die persoon op die video waarsku dat enige kind wat Maandag in skooluniform verskyn, dit volgens hom op eie risiko doen.
“Die VF Plus beskou hierdie dreigemente as hoogs onverantwoordelik,” sê dr. Wynand Boshoff, VF Plus-LP en hoofwoordvoerder: Basiese onderwys.
“Die gespartel om iets belangrik kwyt te raak, beteken dat die EFF tans bont praat. Aan die een kant moet skole volgens die party sluit om die verspreiding van Covid-19 te beperk. Aan die ander kant het die party se leier, Julius Malema, tydens ‘n Jeugdag-toespraak gesê dat hy hom voortaan aan geen inperking sal steur nie,” sê Boshoff.
“Malema se argument is dat die jeug van Suid-Afrika werk nodig het en dat inperkings nie werk skep nie. Daarom moet die regering volgens hom dadelik die hele bevolking inent en alle inperkings is sinneloos. Hy is dus selfs bereid om tronkstraf uit te dien vir sy weiering om inperkings na te kom.
“Dit is duidelik dat die EFF onsamehangend raak in sy ywer om populistiese uitsprake te maak. Die vraag is hoe dit sin maak om skole te sluit wanneer ander inperkings waardeloos is. Wat die party wel regkry, is om gemoedere op te jaag.
“Ouers is van nature beskermend teenoor hul kinders en EFF-lede wat skoolkinders bedreig, mag hulle teen ‘n figuurlike klipmuur vasloop. Die VF Plus doen ‘n beroep op wetstoepassers om Maandag op ‘n gereedheidsgrondslag te wees. Hoewel daar ‘n algemene gevoel is dat die EFF nie op hierdie punt ernstig geneem kan word nie, is die optrede van enkele lede onvoorspelbaar. Skole en ouers moet dus ook Maandag op hul hoede wees. Indien EFF-optrede tot konfrontasie lei, sal die party met sy onverantwoordelike uitsprake die skuld daarvoor moet dra,” sê Boshoff.
***********************************
Opdatering deur Vaalweekblad:
* Die minister van basiese onderwys, Angie Motshekga, het gister, 19 Junie, aangekondig dat Suid-Afrika se skole Maandag oop sal bly ondanks ‘n opvlamming van Covid-19 gevalle.
Sy het voorts gesê: “Ons glo dat skole oop moet bly. Ons is nie ongevoelig vir die kommer oor die toenemende infeksies nie maar die departement het die besluit (om skole oop te hou) geneem op grond van advies van mediese kundiges. Hoewel daar ontwrigtings in die sektor was, is die meeste skole stabiel,” het sy gesê.
