Straatmyl lok meer as ooit
Fochville se hoofstraat, Losberglaan, was die middag van Woensdag, 25 Oktober 'n miernes van beweging toe meer as 'n duisend deelnemers vanjaar se Re/Max Gold en Hoërskool Fochville Straatmyl aangepak het.
Die straat is met die borde van 340 borge versier en die hoogtepunt van hierdie jaar se gebeurtenis was die opwindende debuut van die Mascot-wedloop, wat ‘n groot aantal toeskouers na die strate gelok het. Dit was ‘n vertoning van ware geesdrif en gemeenskapsgees.
Behalwe vir individuele deelnemers van alle ouderdomme, was daar ook ‘n nuwe toevoeging van die 4 x 400 m aflosse, met deelnemers wat hul uithouvermoë en samewerking ten toon gestel het.
Die “Elite Run” het die toeskouers asemloos gelaat met ‘n opwindende vertoning van vaardigheid en uithouvermoë, waar Jerry Motsau en Danielle Verster as die kampioene uit die stryd getree het.
Re/Max Gold en Hoërskool Fochville wil graag hul opregte dank uitspreek aan al die borge vir hul onmisbare bydraes, asook aan al die organiseerders vir hul onvermoeide toewyding en elke deelnemer wat hierdie dag ‘n sukses gemaak het.
Spesiale erkenning word ook gegee aan President Square vir die geleentheid om die opwindende gebeurtenis op hul perseel te huisves.
Van die begunstigdes van hierdie jaar se straatmyl is die Siebies atlete met die oog op hul toer aan die einde van die jaar, asook Hoërskool Fochville. Daar word ook beplan om Losberglaan se stopstrate te verf. Die ander begunstigdes sal mettertyd aangekondig word.
“Die Straatmyl van 2023 sal vir baie ‘n dag wees om te onthou, een wat die gemeenskap saamgebring het in ‘n gees van gesonde mededinging en samewerking. Hierdie viering van sport en gemeenskap is ‘n weerspieëling van die welwillendheid en veerkragtigheid van Fochville se mense,” sê een van die organiseerders, mnr. Willie Roeland.
Sien hier nog foto’s van die Straatmyl:
