FRC-lede reg vir Comrades
Langasems van FRC (Fanatics Racing Club) gaan Sondag aan die jaarlikse Comrades ultramarathon deelneem.
Altesaam 20 van die klub se lede gaan vanjaar die Comrades aandurf.
Dié uitmergelende wedloop begin Sondag om 05:30 en deelnemers het 12 ure om die 87.7 km te voltooi.
Deelnemers hardloop vanjaar afdraend aangesien dit in Pietermaritzburg begin en by die Kingsmead Stadion in Durban eindig.
Eureka De Smidt, Lumeri Feyt, Adrian Stallenberg en Victor van der Merwe gaan vanjaar die Comrades vir die eerste keer aandurf.Die klub se twee vasbyters wat al aan die meeste Comrades-marathons deelgeneem het, is Olebile Pule en Elmarie Hayes wat vanjaar altwee hul 19de Comrades aanpak.
Intussen gaan Paul du Plessis, Stefan Feyt, Jabulane Naas Lambert, Coleen Schmidt en David Volkwyn hul tweede Comrades aandurf.
Michael Cuypers, Bernie Jansen en Lize Jansen hardloop hul vierde Comrades, terwyl Pierre Janse van Rensburg die wedloop vir die vyfde keer en Ian du Plessis en Annalisa Freese dit vir die negende keer gaan aandurf.
Donovan Williams hardloop sy 10de Comrades, Conrad Freese sy 12de en Fochville se ster-langasem, Cornel Metcalfe, haar 16de Comrades.
