Een van Potchefstroom se legendariese figure in brandbestryding, polisie en nooddienssektore, Rudi du Toit, is op Vrydag, 21 Januarie op 59-jarige ouderdom aan ‘n hartaanval oorlede.
Du Toit het die afgelope twee jaar ook met ‘n melanoomkanker gesukkel. Hulde het ingestroom vir hierdie kollega, familieman en vriend wat ‘n diep impak op verskeie lewens gehad het. Hy het ‘n vurige passie vir brandbeskerming gehad en altyd sy taak met ywer aangepak.
Du Toit was vir baie jare hoof van die polisie reserviste in Potchefstroom met die rang van sersant. Hy was ook sedert 2008 die vise-voorsitter van die Potchefstroom Brand Beskermingsvereniging tot en met sy afsterwe. Hy was ook lid van JB Marks wyk 2, wykkomitee.
Gavin Edwards, ‘n lid van die Noordwes Provinsiale wetgewer, beskryf Du Toit as iemand wat dag en nag vir sy gemeenskap geveg het.
“Rus in vrede, ‘n absolute legende. Min sal ooit besef watter massiewe impak hierdie man in die gemeenskap gehad het. Die eerste persoon wat ek ontmoet het toe ek 14 jaar gelede in Potch aangekom het. Laataand koffie. Hang saam met sy EMS en polisie families. Hy bepleit die saak vir soveel dronk studente om hulle om 02:00 uit die tronk te hou. Hy was altyd net ‘n oproep weg. Vol grappies,” onthou hy.
“Hy was wel ook ‘n moeilike man wat my soms hel gegee het, maar was terselfdetyd altyd ondersteunend en raadsaam. Hy beveg onmoontlike brande en is altyd gereed om te help. ‘n Pappa-pa vir sy kinders. Altyd so trots. My innige meegevoel aan sy familie, uitgebreide families (Polisie, Brandweer, EMS, Boere) en vriende,” noem Edwards.
Du Toit laat sy vrou, Retha, twee kinders, twee broers en ouers agter.
