Hoërskool Fochville beloon presteerders

Volgens ‘n woordvoerder van die skool, me. Elsabe de Mesquita, moes leerlinge én onderwysers lank vir ‘n spesiale uitstappie wag.
“Met groot afwagting het 2020 aangebreek.
“Dit sou díé jaar wees; spesiaal en uniek in baie opsigte. Min het ons geweet dat Covid-19 ander planne vir ons gehad het en dat 2020 wél onthou sal word, maar vir ander redes as wat ons in gedagte gehad het.
“Nie net is alle sport- en kultuuraktiwiteite ook by skole opgeskort nie, maar ook alle toere.
“Groot was die hartseer dat selfs die Top 10-toer vir akademiese presteerders by Hoërskool Fochville gekanselleer moes word.
“2021 was ook nes ‘n ‘rollercoaster’ met baie oppe en affe en onsekerhede vir skole.
“Hoewel ons weer nie ons 2021 akademiese presteerders op ‘n toer kon neem nie, het ons op 2 Desember 50 opgewonde gr. 8 tot 12-leerders met ‘n uitstappie na Gold Reef City beloon.
“Baie dankie aan elke Fochie-onderwyser wat ure se harde werk en deursettingsvermoë in elke kind belê het en me. Nortjé en ons bestuursliggaam wat hierdie uitstappie vir ons Top 10 akademiese presteerders moontlik gemaak het,” sê sy.