“Ek wil net vir dr. Alex Chako, die veearts van Paws wat my hond se lewe gered het, dankie sê.” So sê Tony da Costa verlig.
Sy hond het drie weke gelede baie siek geword en twee verskillende veeartse kon nie bepaal wat die oorsaak van sy maagongesteldheid was nie. Vir dié behandelings moes Tony altesaam R10 000 opdok en steeds was sy Oscar, ‘n Golden Retriever kruising, baie siek.
“Ek was desperaat, want my hond het binne twee weke 8 kg verloor en kon geen kos inhou nie. Eers het die een dokter gedink Oscar het ‘n maagvirus. Toe die simptome nie na medikasie wou opklaar nie, het ek my hond na ‘n ander veearts geneem. Hy het weer ander kos voorgeskryf,” vertel Tony.
Na die derde week was Tony desperaat en het hy besluit om Oscar nog een keer na ‘n veearts te neem. By Paws het dr. Chako ‘n x-straal geneem en gesien dat Oscar ‘n tafeltennisbal ingesluk het.
Hy het dadelik geopereer en die bal verwyder, waarna Oscar nou weer springlewendig is. “Ek neem nie die dokters kwalik oor die diagnoses nie. Oscar het algemene simptome getoon. Tog wil ek mense aanmoedig om Paws meer te ondersteun,” sê hy.
