Video: Ablusiegeriewe by Potch Dam onbruikbaar
Buiten die vuil en gevandaliseerde fasiliteite is daar ook al vuur binne die ablusieblokke gemaak, terwyl spuitnaalde en dooie vlermuise ook al gevind is.
Die agteruitgang van Potchefstroom Dam is al vir lank ‘n groot bekommernis vir Potchefstromers.
Die ablusieblokke is veral ‘n seer oog met gebreekte wasbakke en verstopte toilette wat besoekers noop om eerder hulle besigheid buite hierdie ontspanningsoord te doen.
Video: Wouter Pienaar
Buiten die vuil en gevandaliseerde fasiliteite is daar ook al vuur binne die ablusieblokke gemaak, terwyl spuitnaalde en dooie vlermuise ook al gevind is.
Die JB Marks Munisipaliteit het ook nie vanjaar ekstra geld in die 23/24 mediumtermyn begroting vir die opknapping van die Potchefstroom Dam begroot nie. Dit is dieselfde verhaal by die beplande 24/25 en 25/26 boekjare.
Dit blyk uit die projeksie van die 2022/2023, 2023/2024, 2024/2025 begroting dat JB Marks nie enige voorsiening maak vir ‘n inkomste uit die afdeling Sport, Kuns en Kultuur nie. Die begroting vir 2023/2024 is reeds so goedgekeur.
Daar is wel ‘n ligpunt in al hierdie chaos met een van gereelde hengelaars by Potch Dam, Loukie van der Merwe (45), wat saam met Riaan van Wyk van RVW Scrapyard en Emil Pitout van Daly Ford kragte saamspan om een gedeelte van die ablusieblokke op te knap.
Foto’s van hoe die badkamers in een van die ablusieblokke by die Potch Dam lyk (Foto’s: Wouter Pienaar)
“Ons het navraag gerig om toiletgeriewe oor te doen en op te knap. Dit het een dag geneem om een van die blokke net skoon te maak, maar daar kort nog baie werk. Die plan is om algehele herstelwerk te verrig sodat die geriewe weer op standaard is” noem Loukie.
Volgens Loukie, wat ongeveer drie keer per week by die dam hengel, is daar veral oor naweke sedert die Covid-19 pandemie ‘n groot afname in kampeerders en naweekgangers.
“Daar is omtrent ‘n 80 persent afname, juis omdat die fasiliteite in so toestand is. Mense wil nie hier kamp en visvang en dan nie die geriewe behoorlik kan gebruik nie,” meen Loukie.
Vir meer inligting oor die opknappingsprojek kan Loukie by 072 695 8486 geskakel word.
*Teen druktyd het die JB Marks Munisipaliteit nog nie terugvoer op die Herald se navrae gegee nie.
https://potchefstroomherald.co.za/128391/ablusiegeriewe-by-potch-dam-onbruikbaar/?fbclid=IwAR1oiwQBqvJyj1a_7rYDFT0hPfz9XfAhGd2iQ2hfyV-jMoZ5_s-7cUSkToM
