Trae reaksie van Merafong-munisipaliteit laat ‘n deel van Carletonville byna ‘n week lank kragloos

Selfs die snerpende koue wat tans in Gauteng ondervind word, kon nie die munisipaliteit aanspoor om die vervanging van die transformator te bespoedig nie. Die Kernite-substasie wat verlede Woensdag aan die brand geslaan het, het uitbreiding 1 in Carletonville sonder elektrisiteit gelaat. Strate wat geraak word, is Kernite, ‘n gedeelte van Agnew, Flint, Hornstone, Jade en ‘n gedeelte van Koalin. Volgens mnr. Ben van den Berg van die VF Plus is daar na verskeie navrae aan die munisipaliteit se elektrisiteitsafdeling, deur die munisipaliteit se kommunikasie-afdeling bevestig dat die aankoop van ‘n 500 KVA-transformator vandag afgehandel is en dat met herstelwerk begin sal word. Dit is egter onbekend hoe lank die gedeelte nog sonder elektrisiteit sal wees. Die VF Plus is van mening dat die Kernite-substasie prioriteit moet geniet in die lig van skerp dalende temperature. Talle mense kan nie ‘n  kragopwekker bekostig nie. Die Merafong-munisipaliteit is weens wanbestuur onder finansiële druk en kan nie sy diensverskaffers betyds betaal nie. Diensverskaffers wag tot 108 dae voor betaling plaasvind.