Bekende sterf self agter die stuur op pad na sterwende moeder

Pas na die foonoproep het Fébé in haar versorger se arms inmekaargesak en haar laaste asem uitgeblaas.

Die versorger het Jacques dadelik weer gebel om die doodstyding oor te dra, maar het toe die skoknuus gekry dat Jacques self agter die stuur van sy motor inmekaargesak en gesterf het.

Ondanks die hartseer gebeure is daar ook baie dankbaarheid by die gesin. “Sampie was gelukkig die oggend saam met Jacques en kon die motor tot stilstand bring. Daar was baie verkeer, maar ‘n weldoener wie se naam ons nie het nie, het agter hom gery, vermoed wat gebeur het en hulle bygestaan. Jacques het rustig gegaan. Sy moeder het rustig gegaan. God het reeds alles vooruit beplan,” sê Louise.

Jacques, ‘n oudleerling van die Hoërskool Vanderbijlpark, het 25 jaar in Sasolburg gewoon en was ‘n werknemer van Sasol Polimers. Hy sal veral onthou word as ‘n gesinsman, maar ook vir sy betrokkenheid by AfriForum, buurtpatrollies en skoonmaak-aksies in die dorp.

“Hy het oral gehelp waar iemand hom nodig gehad het,” sê Louise.

Sasolburg se AfriForumtak het in ‘n boodskap van medelye op Facebook gesê Jacques se dood, verlede Dinsdag, was ‘n baie hartseer dag vir almal van die tak. Hulle sal hom onthou as ‘n man van integriteit wat ‘n groot positiewe stempel op die mense om hom afgedruk het.

Vir Louise is haar man se plekkie leeg, en sy sê sy sien en voel hom steeds oral, “…maar Jesus het besluit hy gaan eerste en dis hoe ons dit moet aanvaar.” Sy is dankbaar vir die jare se saamwees en vir alles wat hulle kon deel.

Sy sê hy het sy laaste week by die see, ‘n week voor sy dood, besonder baie geniet en hulle het heelwat selfies geneem – iets wat hulle nie sommer gedoen het nie. Vandag is sy dankbaar oor dié laaste herinneringe aan hom. ‘n Troosdiens vir Jacques en sy ma is Dinsdagoggend gehou. Wyle Fébé is volgens haar wens bo-op haar oorlede man in dieselfde graf begrawe, en Jacques gaan veras word.

Fébé sou op 28 Maart haar 80ste verjaardag gevier het, en Jacques en Louise, eienares van HeBrews Koffiewinkel, sou op 30 Maart 30 jaar getroud gewees het. Jacques word buiten Louise ook deur hul kinders, Gerhard (28) en Lizelle (25) oorleef.

* Die Struwig gesin bedank almal wat hulle in dié moeilike tyd onderskraag. Hulle sal ook graag kontak wil maak met die weldoener wat bystand op die toneel verleen het. Die persoon kan Vaalweekblad by 083 246 0523 kontak om met die gesin in aanraking te kom.