’n Somber atmosfeer het gisteraand (Woensdag) geheers toe ’n groot groep mense ’n nagwaak bygewoon het vir die vermoorde Hendrik van Dyk (46).
Van Dyk is Saterdagaand dood toe hy slegs meters van sy woonstel in Goodsweg toe hy vermoedelik verskeie kere met ‘n mes of ’n ander skerp voorwerp gesteek is.
Sy liggaam is Sondagoggend vroeg ontdek, nadat ’n groot groep rolspelers en vrywilligers na hom gesoek het.
Lees: Man se lyk ontdek nadat vrou sy pantoffel raaksien
Vriende, familie en belangstellendes het gisteraand, ten spyte van die reën, saamgekom op die presiese plek waar Van Dyk se liggaam in ’n sloot gevind is.
Sy vrou, Elain (36) en hul enigste seun Barend (18) was ook teenwoordig.
Mense het kerse vasgehou en blomme geplaas om hul laaste eer te betoon.
Die nagwaak is deur die VF Plus raadslid Riaan van Zyl, wat ’n vriend van die gesin is, georganiseer.
‘n Groot groep van die Brakpan Gemeenskappolisiëringsforum (GPF) het diens gedoen by die nagwaak en gesorg dat die verrigtinge glad verloop en die verkeer nie ontwrig word nie.
‘n Aangedane Van Zyl het gesê die gemeenskap van Brakpan moet saamstaan teen misdaad.
