Vrou bedel vir haar jong kinders
“Daar was ook mense wat neerhalend was en lelike opmerkings gemaak het.”
Vir nege maande lank het motoriste wat in Dalpark gery het gewoond geraak aan ’n kort donkerkop vrou wat by die kruising van Athlonelaan en Norfolkstraat gestaan en bedel het.
Aanvanklik was dit nie duidelik dat sy swanger was nie, maar die handbewegings wat sy vir aankomende motoriste op haar maag gemaak het, het daarop gedui.
Later het haar maag saam met haar ongebore baba gegroei en kon motoriste duidelik sien dat dit ’n swanger vrou was wat dag na dag gestaan en bedel het.
Lees ook: Ouers moet nie kinders gebruik om te bedel nie
Marlize Ekron (36) se babaseuntjie is op 31 Mei gebore.
Sy en haar man, Mark (34), het ook ’n dogtertjie wat op 2 Julie ’n jaar oud sal wees.
Die egpaar kry swaar en vandaar Marlize se uitweg om te bedel, maar soos sy self gesê het: “Ek doen dit vir my kinders en nie vir myself nie.”
Sy het vertel dat dit tydens haar swangerskap soms baie moeilik was om elke dag vir ure te staan en bedel. Veral toe haar swangerskap gevorderd was.
“Daar was wel mense wat gehelp het en ons is baie, baie dankbaar,” het sy gesê.
“Tog was daar ook mense wat neerhalend was en lelike opmerkings gemaak het. Daar was ’n vrou, toe ek reeds ver swanger was, wat eendag vir my gesê het dat sy langs my wil kom staan, want dit lyk lekker gemaklik.
“Maar die Here se genade het my deur moeilike tye gedra.”
Die Ekron-egpaar het ’n blyplek en sorg dat hul twee kinders nie honger ly nie.
“Dit is waarom ek bedel. My man sukkel al vir meer as ’n jaar om werk te kry. Dit is moeilik daar buite. Baie mense kry swaar,” het Marlize gesê.
“Ons grootste behoefte op die oomblik is formule melk en doeke vir my baba. My dogtertjie drink beesmelk,” het sy verduidelik.
Marlize probeer altyd ’n plan maak om haar kinders onder toesig te hê wanneer sy bedel.
Lees ook: Bedelaar wil nie koffie van weldoener hê nie
“Ek wil hulle nie saam met my langs die pad hê nie. Dit is nie ’n goeie ding nie,” het sy gesê.
“Wanneer ons kos of ’n kospakkie kry help dit ook baie, want dan kan ek die geld wat ek ontvang gebruik vir die kinders. My kinders sal altyd eerste kom.”
Have a story?
Contact the newsroom by emailing: Thelma Koorts (editor) brakpanherald@caxton.co.za or Stacy Slatter (news editor) stacys@caxton.co.za
Remember to visit the Brakpan Herald on the following social media platforms:
Follow us:
