Laerskool Môrewag bied skaaktoernooi aan

Skaakspelers van Laerskool Môrewag het Saterdag aan ’n interhuis skaaktoernooi deelgeneem.
Altesaam 30 leerders het aan die toernooi, wat in twee afdelings opgedeel was, deelgeneem. Daar was ’n groep vir beginners en vir gevorderde spelers.
In die beginnergroep was die wenner Brendane van Greunen (10) en die naaswenner Damian van Loggerenberg (10).
Logan de Beer (12) het die regte skuiwe gemaak en het in die groep vir gevorderde spelers koning gekraai. Die naaswenner was Crystal van Zyl (14).
Logan, wat baie in sy noppies was oor sy wen, speel al skaak vir drie jaar.
“Ek speel gereeld teen my ouers en dan oefen ek baie op die internet. In ’n week speel ek tussen 15 en 20 keer,” het Logan vertel.