Standard Bank Innibos Kunstefees word digitaal aangebied
Die voortslepende Covid19-pandemie bring mee dat feesorganiseerders en kunstenaars meer kreatief as ooit te werk moet gaan.
Die Standard Bank Innibos Kunstefees gaan van 26 Junie ’n digitale kunstefees aanbied vir feeshonger musiek- en toneelliefhebbers.
Dit vervang nie die fees wat vir Desember beplan word nie, maar is ‘n opwindende toevoeging tot die Innibos- program vir feesgangers wat so uitgesien het na die Junie-fees.
Innibos Digitaal, wat gehou word in die tydgleuf wat die kunstefees oudergewoonte in Mbombela gehou sou word, bied sowat 20 produksies aan wat opnames van musiek en toneel uit die kunstefees se argiefskatkis insluit.
’n Eerste in die Afrikaanse toneelbedryf is die digitale debuut van Leengoed, ’n komiese drama met Tobie Cronjé en Wynand van Vollenstee.
’n Virtuele prysuitdeling van die hoog aangeskrewe Innibos Nasionale Kunshandwerkkompetisie (National Crafts Awards) met ’n totale prysgeld van R100 000 sal die digitale fees afskop.
Sandra Jacobs, media- en bemarkingsbestuurder van Innibos, het gesê die voortslepende Covid19-pandemie bring mee dat feesorganiseerders en kunstenaars meer kreatief as ooit te werk moet gaan.
“Innibos Digitaal wil eerstens kunstenaars in dié uitdagende tye bystaan en seker maak hulle kry steeds ’n inkomste.
Lees: Skole maak gereed om graad sewe en 12 leerders Maandag te ontvang
“Die kunstefeesbedryf moet ook aanpas by die veranderde tye en beskikbare tegnologie tot ons voordeel gebruik. Dit is wel ’n ietwat onbekende terrein maar ons gryp dit met albei hande aan,” het Jacobs gesê.
Innibos het deur die jare ’n argief opgebou met opnames van musiek- en toneelproduksies wat nou met vrug gebruik kan word, sê Sandra. Nuwe opnames word in samewerking met Coleske Kunstenaars en MGG Produksies gedoen.
“Innibos Digitaal is die gulde geleentheid vir liefhebbers van Afrikaanse musiek en toneel wêreldwyd om toegang te kry tot topproduksies en daardeur kunstenaars te ondersteun,” aldus Sandra.
Die Innibos Digitaal-program sluit in die JacarandaFM-konsert en kykNet-Verjaardagkonsert wat verlede jaar deur duisende mense op die feesterrein bygewoon is. Die kykNet-Verjaardagkonsert het ’n Fiësta-toekennings ontvang as die beste opelug musiekproduksie landwyd.
In ander musiekproduksies is Stef Bos te sien in Bos innie Bos, Kevin Leo en Jannie Moolman in Crooners en Jannie du Toit in Doep is nie dood nie. Buiten die debuut van die drama Leengoed, is die toneelaanbod onder meer Manne, met onder andere Chris Vorster, People are living there met Anna-Mart van der Merwe en Op my eish! met Neels van Jaarsveld. Die volledige program sal binnekort bekend gemaak word.
Kaartjies vir die Standard Bank Innibos Kunstefees Digitaal sal van 15 Junie by Computicket bespreek kan word.
Feesgangers sal ’n skakel ontvang. Die skakel bly vir 48 uur aktief nadat dit geaktiveer is.
Die beoogde datum vir die volledige Standard Bank Innibos Kunstefees is 10 tot 13 Desember, afhangend van die regeringsregulasies rondom die Covid19-pandemie.
Het jy ‘n storie?
Stuur ‘n e-pos aan: Thelma Koorts (Redakteur) brakpanherald@caxton.co.za
of Stacy Slatter (Nuus Redakteur) stacys@caxton.co.za
of Miné Fourie (Joernalis) minev@caxton.co.za
Onthou om die Brakpan Herald te volg op die volgende sosiale media platforms:
For more #hyperlocal news at your fingertips, visit Springs Advertiser, Boksburg Advertiser, Benoni City Times, African Reporter
