Unieke tuin het ‘n storie te vertel

‘n 51-jarige inwoner van Dalview steek haar besondere tuin agter hoë mure weg. Daleen Richter woon al 14 jaar in Brakpan en het beslis nie ‘n tekort aan kreatiwiteit wanneer dit by tuin maak kom nie.

Sy het groot geword met ‘n ma wat groen vingers het en jare gelede al ‘n liefde vir tuin maak ontwikkel.

“My ma het die groenste vingers wat ek al ooit gesien het en sy het baie kennis as dit by plante kom,” het sy gesê.

Daleen besoek graag padstalle en markte waar sy skatte vir haar tuin bymekaar kan maak. Daar is ‘n verskeidenheid ongewone items wat tot haar besondere tuin lei.

Enigiets van wynbottels, skulpe, eetgerei en selfs ‘n bad of twee maak deel uit van haar skepping.

LEES OOK: Filthy business to clean up illegal dumping mess gets underway

“Ek heg sentimentele waarde aan dinge, wat dit dan moeilik maak om daarvan ontslae te raak,” het sy gesê.

Om die woning se tuin so indrukwekkend te vertoon, verg egter meer as een persoon se harde werk.

Haar tuinwerker, Larry Matayaya is al vir 11 jaar Daleen se regterhand en werk sy aan sy saam met haar. Daleen kry ook baie inspirasie van haar ma af. Sy verwys na haar tuin as haar skroot tuin omdat sy eerder die items in haar tuin sal aanbring as om dit weg te gooi.

“My tuin het ‘n storie om te vertel en dit is iets waarop ek trots is”.

• Die Herald sal graag van ander inwoners hoor wat ‘n mooi of unieke tuin het. Stuur ‘n e-pos met kontakbesonderhede na melissa@caxton.co.za