Lunilda is Die Anker se trots met sewe onderskeidings
Lunilda Lubbe was vanjaar die top uitblinker by Hoërskool Die Anker en was verheug toe sy Woensdagoggend haar finale eksamenuitslae ontvang het.
Dié knap leerder spog met sewe onderskeidings wat sy gekry het vir Afrikaans huistaal, Engels eerste addisionele taal, wiskunde, lewensoriëntering, rekeningkunde, besigheidstudies en ekonomie.
Lunilda het ’n verstommende 97 persent vir rekeningkunde behaal en spog met ’n gemiddeld van 88 persent.
Die 267 matrieks van Hoërskool Die Anker wat die eindeksamen geskryf het, het ook goed gevaar.
Die leerlinge het altesaam 117 onderskeidings ingehark en 46 persent het met universiteitstoelating geslaag. Die skool se slaagsyfer het die 100 persent mylpaal gemis met ’n skrale 0.75 persent.
Brumilda Borcherds en Tyrone du Plessis het vyf onderskeidings los geskryf.
Karen Lotter, Wayne McCarter, Melissa Peyper, Jolandie van Aarde en Marike van Staden het elk vier onderskeidings ontvang.
Lees ook:
Die Anker se nuwe hoof is op sy pos
