VRYDAG 13 Mei was beslis nie ’n bygelowige dag toe Laerskool Randhart se twee spogkore, die Kiewietkoor en Randrefrein, hul koorwerke aangepak het in Pretoria tydens die Super 12-kompetisie nie.
Albei kore het na maande se harde werk, uitmuntend gevaar en albei het weggestap met cum laude (90+) toekennings.
Randrefrein, met 92 lede, het vuurwerke veroorsaak en luisteraars beïndruk met hul vier koorwerke. Die Kiewietkoor, met 66 lede, het met hul pragtige gesigspel die gehoor en beoordelaars bekoor met hul engelstemmetjies en is aangewys as die junior wenkoor van die kompetisie.
