Ligstad groet Trix

ALBERTON –  Saam met Alida Jooste, maatskaplike werker/projekbestuurder van Ligstad, het sy gehelp dat Ligstad se vere reggeskud kon word vir die opening van die naskoolsentrum op 3 September 2012.

Met haar positiewe lewensuitkyk en haar entoesiasme was Ligstad se naskoolsentrum gereed vir die eerste kinders wat op 3 September 2014 by die res van 2012 s’n by Ligstad aangesluit het. Haar entoesiasme en charisma het vinnig in die harte van die kinders, waarvoor sy verantwoordelik was, en die ouers van die kinders se harte ingeklim. Van 14 kinders in 2012 het Ligstad se naskoolsentrum gegroei na die meer as 50 kinders wat tans by Ligstad inskakel.

In Junie 2014 het sy die geleentheid gekry, danksy ‘n weldoener wat haar studies wou borg, om verder te gaan studeer. Sy het gewik en weeg tussen onderwys en maatskaplike werk, en uiteindelik het maatskaplike werk gewen en het sy keuring ontvang by NWU Potchefstroom se kampus om voltyds maatskaplike werk te gaan studeer.

“Ligstad is saam met haar opgewonde oor die nuwe hoofstuk in haar lewe, maar weet ook dat sy ‘n leemte los by Ligstad,” sê Alida Jooste.

Trix se laaste dag by Ligstad is 12 Desember 2014, wanneer Ligstad sluit vir die Desember vakansie. Ligstad waardeer haar dienste nog tot daardie dag.

“Daar sal nog formeel van haar afskeid geneem word, maar ons wil graag namens die gemeenskap van Alberton vir Trix alle voorspoed en sukses toewens vir haar bydrae sedert Augustus 2012 om Alberton-Noord en die gemeenskap te verbeter,” sê Alida Jooste

Gaan maak Alberton en Ligstad trots, Trix!