Hardloop vir Bybels
Of jy nou hardloop of nie, jy kan deur middel van 'n donasie help om Bybelverspreiding te bevorder.
Om 05:30 op 1 Junie 2014 spring duisende atlete voor die stadsaal in Pietermaritzburg weg vir die jaarlikse Comrades Marathon na Durban. Baie van hierdie atlete is ook deel van die Bybelgenootskap van Suid-Afrika se Hardloop vir Bybels-projek.
Aangesien Comrades-atlete en hul ondersteuners die projek jaar na jaar so geesdriftig ondersteun het, is daar besluit om dit opnuut uit te brei. Voortaan sal dit weer ‘n heeljaar-projek wees. Atlete en hul ondersteuners kan self besluit watter wedloop of pretloop hulle wil gebruik as deel van die Bybelgenootskap se Hardloop vir Bybels-projek vir 2014. Comrades-atlete darenteen hardloop vanjaar vir die 24ste agtereenvolgende keer vir Bybels.
Atlete word per kilometer geborg en elke R40 wat ‘n atleet insamel, help die Bybelgenootskap om ‘n bekostigbare Bybel beskikbaar te stel. Die Bybelgenootskap wend die fondse wat deur die Hardloop vir Bybels-projek geïn word aan om in spesifieke Bybelbehoeftes te voorsien en om dit vir duisende mense moontlik te maak om ‘n Bybel te bekom.
Die Bybelgenootskap voorsien reeds vir 194 jaar in Suid-Afrika in die Bybelbehoeftes van ons mense. Ons taak sluit in die vertaling en produksie van die Bybel, asook die verspreiding daarvan onder alle Suid-Afrikaners. Vanjaar beywer ons ons in die besonder vir die volgende:
*Om gratis Bybels ten bedrae van R800 000 vir gevangenes te bewillig.
*Om Bybels gratis op ‘n verantwoordelike manier beskikbaar te stel aan die armstes van armes ten bedrae van R700 000.
*Om deur middel van Bybelgebaseerde geletterdheidsmateriaal basiese geletterdheid, asook Bybelgeletterdheid onder alle ouderdomsgroepe te bevorder.
*Om gratis Bybels ter waarde van R1 000 000 beskikbaar te stel aan graad 7-leerders in skole in die armste dele van ons land.
*Om ‘n Bybelvertaling in hedendaagse isiZulu beskikbaar te stel.
*Om ‘n Bybel in doofgerigte Engels in Suid-Afrika en in Afrika vir Dowes, wat die Bybel in Engels gebruik, beskikbaar te stel.
*Om ‘n goed verstaanbare, bronteksgeoriënteerde Afrikaanse vertaling van die Bybel, wat geskik is vir voorlesing en gebruik in eredienste, Bybelstudie en persoonlike gebruik, beskikbaar te stel.
*Om Bybelvertalings van hoë gehalte in Suider-Afrika te verseker.
*Om die Bybelgenootskappe in Botswana, Lesotho, Namibië en Swaziland te help met hul taak om Bybels te voorsien.
*Om miljoene Christene in China, veral diegene op die platteland, te help om ‘n bekostigbare Bybel te kan koop en ook om gratis Bybels te verskaf aan diegene wat dit glad nie kan beskostig nie. R380 000 is vir die projek bewillig.
Sonder die wonderlike ondersteuning van die Bybelgenootskap se donateurs is dit nie moontlik om ons taak om bekostigbare Bybels beskikbaar te stel uit te voer nie.
Atlete wat aan die Hardloop vir Bybels-projek wil deelneem, ongeag die wedloop, word versoek om die Bybelgenootskap se webwerf te besoek by www.bybelgenootskap.co.za of die Bybelgenootskap telefonies te kontak: Past George Thompson of Marina Stebbing by stebbing@biblesociety.co.za of by 011 970 4010.
